Berria

Bizimodu osasungarria, parte-hartzailea, aktiboa eta segurua ekarriko duen zahartze aktiboa eta belaunaldiartekotasuna sustatzeko asmoz, NAGUSIren 22. edizioa egingo da Bilbao Exhibition Centren, Adinduentzako Aisialdi, Zerbitzu eta Jardueren Azoka. Jardueren egitarau zabala izango da, eta, bertan, adin guztietako pertsonek beren ezagutzak eta gaitasunak garatu ahal izango dituzte.

Premisa horietan oinarrituta, Nagusi aisia eta dibertsiorako topaketa da. Hortaz, azokara joaten direnek jarduera ugari aurkituko dituzte, baita enpresa eta erakunde asko ere, sektore publikokoak nahiz pribatukoak; guztiek ere adinekoen bizi-kalitatea optimizatzera zuzendutako produktu, zerbitzu, teknologia eta ekipamendu ugari eskaintzen dituztenak.

Beraz, Nagusiren 2018ko edizio honetan, aisia edota kirolarekin lotutako aukerak proposatuko dira, eta adinekoen egungo egoera pertsonalarekin erlazionatuta dauden elkarteak ezagutu eta haietan parte hartu ahal izango da, baita boluntario gisa aritzeko eta besteei laguntzeko ereduen berri izan ere. Osasuna, aisia eta zerbitzuak dira Nagusiren 2018ko erakusketariek bisitarien eskura jartzen duten kalitate handiko eskaintzaren oinarrizko ardatzak. Era berean, Nagusiren 2018ko edizioan, konponbide ugari eskainiko zaizkie adinekoak zaintzen diharduten pertsonei eta profesionalei; bi talde horiek garrantzi berezia dute azokan.

Erakusketa honek Eusko Jaurlaritzaren eta Bilboko eta Barakaldoko udalen laguntza du, baita Bizkaiko Optiko Optometristen Elkargo Profesionalarena eta BBKrena ere.

Azaroaren 9an, ostirala, izango da inaugurazio ofiziala, 12:00etan, Barakaldoko alkate Amaia del Camporen eskutik.

JARDUERA LUDIKOEN ETA PARTE HARTZEKO JARDUEREN ESKAINTZA ZABALA

Parte hartuko duten hogeita hamar erakusketariak nagusiki Bizkaikoak, Gipuzkoakoak, Arabakoak, Kataluniakoak, Valentziakoak eta Galiziakoak dira, eta hainbat sektore ordezkatuko dituzte; besteak beste, profesionalen elkargoak, elkarteak, optikak, entzumen-zentroak, gizarte-boluntarioak, laguntza teknikoak, elikadura-enpresak, administrazioa eta erakundeak, eta hedabideak.

Erakusketariek jarduera ugari gauzatuko dituzte etenik gabe beren standetan. Besteak beste, hauek: hitzaldiak (informaziokoak, aholkularitzakoak, eta parkinsona duten pertsonentzako gizarte-arretakoak), joko didaktikoak, puzzleak, dibulgaziozko materialaren banaketa, eskulanen erakusketa, ikusmen-zolitasunaren kontrolak, dastatzeak, mahai-teniseko erakustaldiak eta partidak, tailer teoriko eta praktikoak, joko eta ariketa didaktikoak, eta psikologia positiboan oinarritutako oroitzapen kolektiboko tailer iraunkor bat.

Horretaz gain, jardueren programa bat diseinatu da, eta azaroaren 9an, ostirala, jarriko da martxan. Jarduera hauek izango ditu, besteak beste: lehen sorospenak emateko eta autozainketak sustatzeko tailerrak, poesia-errezitaldiak, erlaxatzeko eta ohitura osasungarriak sustatzeko ikastaroak, gimnasiako teknikak, psikomotrizitatea, arnasketa eta luzapenak konbinatzen dituzten jarduerak, «show cooking»-ak osasuntsu jateko erakustaldiekin eta dieta osasungarriari buruzko gomendioekin, «botikak behar bezala erabiltzeari» buruzko hitzaldiak, ipuin-kontalariak, dardo-txapelketa, Barakaldoko Musika Bandaren emanaldia, El Regatoko ikastetxearen belaunaldiarteko proiektua «Guztiok irakasten dugu, guztiok ikasten dugu», eta Barakaldoko «Gure-Toki» adinekoen elkarteak agertoki zentralean eskainiko duen koru-emanaldia.

Larunbatean, «BEC-Errekatxo-BEC Belaunaldiarteko ibilaldia»-rekin hasiko da Nagusi, dagoeneko gure azokan klasiko bihurtzen ari dena. Bigarren egunean, beste jarduera batzuk egingo dira; esaterako, gimnasia-ikastaroak agertoki zentralean, puxika-txapelketa, bingoa, moda-desfilea, ehoziri-erakusketa, eta tailer eta ikastaro txiki ugari (adibidez, barreterapiakoak, lehen sorospenetakoak, autozainketak sustatzekoak eta erorikoak saihestekoak). Horretaz gain, dagoeneko tradizionala den eta oso espero den putxeren dastaketa herrikoia ere izango da larunbatean. Han bildutako diru guztia Nagusilanentzat izango da.

Igandeari hasiera emateko, «Nagusi 2018 ibilaldi nordikoa» izango da BECen eraikinaren inguruan. Bitartean, barruan, dagoeneko tradizionala den  Meza Rociera izango da, baita beste jarduera batzuk ere; esaterako, askotariko tailerrak, igel-tokako eta txapel-jaurtiketako txapelketak, abesbatzen emanaldiak, mahai-inguruak eta magia-ikuskizunak. Gainera, azken edizioetan gertatu den bezala, «Vermú dantzaldi» klasikoa egingo da, baita paellen dastaketa herrikoia ere. Bildutako diru guztia Parkinson Nervión Ibaizabal elkarteari emango zaio.

Nagusiren 2018ko edizioa doakoa da. 11:00etatik 14:00etara eta 16:00etatik 20:00etara egongo da zabalik.